1.04.2003
January 4, 2003 || 1:24 amPakiramdam ko'y nagkalat ako. Tila sumabog ang sarili at tumilapon ang mga parte. Watak ang loob.
Napakarami kasing bagay na sinimulan at dapat tapusin. Sa pagpapalit ng taon dapat siguro'y bigyan ng wakas. Sabay-sabay na nagsusulputan ang mga alalahanin, malaki't maliit, at dahan-dahan akong pinipingas hanggang hindi ko na alam kung saan ibabaling ang pansin.
Ilang araw na itong tulala at lilinga-linga. May iniisip ngunit hindi mahuli. Kasama ng mga kaibigan at nakikipagkuwentuhan ngunit iba ang iniintindi. Patawid ng daan ngunit sa iba nakatingin. Kaya't sa nakaraang ilang araw, ilang beses nang muntik masagasaan.
Kahit umupo't idaan sa tahimik, hindi malipon ang sarili. Kahit maglakad ng mabilis, hindi mahagap ang loob.
Saan sisimulan ang pagbuo? Ang pagbawi ng sarili? Ang pagbabalik-loob?
I will claim a corner of the world and write.
Ernan at 1:31 AM