9.05.2002

September 05, 2002 || 12:20 am


Sayang. Nanood ako ng Jologs kanina at sayang. Nakapanghihinayang ang pelikula. Malaman at mayaman ang pinaghuhugutan ng script at hindi mo rin naman sasabihing hindi magaling ang direktor. Kung tutuusin maayos ang pagkakagawa nito at nakatutuwa naman ngunit hindi maikakaila ang pagkakahawig nito sa formula at konsepto ng Magnolia . Mula sa pinakabuod na tema ng pelikula hanggang sa isang malakihang pangyayari para maitagni ang lahat ng mga butil ng istorya. Hindi ko alam kung sadya o hindi ngunit pansin naman ng lahat ang pagkakawangis.

At nakalulungkot, tila kasi lahat na lang ng ginagawa nating pelikula ay kopya, segunda klaseng duplicate. Makikita at batid mo namang puwedeng hindi manggaya. Hindi ko tuloy alam kung katamaran ba mag-isip ang pinaguugatan nito o sadya lang bang nasasaloob na talaga natin na mas maganda't magaling ang sa mga dayuhan.

---

Kanina paglabas ko ng sinehan, nanliit ako. Iyong pagliit na pisikal, na tila napakalaki ng lahat sa paligid. Sa paningin ko, ang lawak ng kalye, ang taas ng gusali, ang layo ng distansya na lalakbayin. Saka lamang pagdating sa bahay napinta ko ang nadama. Nilalamon ako ng daigdig at sinasakluban ng buhay. Bigla na lang binubulaga ka at makikita mo na wala ka na at ginigitgit ka ng buhay. Tipong sige ka ng sige, hindi mo naman pala alam ang pinagkakaabalahan mo. Nawala ka na at nalinlang ka. Pagsilip mo muli, nagbago na ang lahat. Kinakailangan mo muling pumirme at huminto at makiramdam sa sandali, unti-unting patingkarin ang sarili at hayaang tumangkad ang kalooban para puwede ka na uling makipagsabayan.

Ernan at 12:56 AM

0   comments

0 Comments

Post a Comment

---